車手獎申請懶人包｜申請資格、金額計算、索償教學一文睇清

車手獎係咩？

「車手獎」其實唔係一個官方名稱，而係坊間對交通意外傷亡援助計劃（由社會福利署負責推行）嘅俗稱。之所以會叫「車手獎」，係因為過往好多電單車司機（俗稱「車手」）出意外之後都會申請呢個計劃，所以慢慢就有咗呢個名字。

重點係：呢筆錢唔係賠償，亦唔需要證明對方有錯。 無論你係行人、乘客、司機、電單車手，只要符合條件，都可以申請。

你可能會問：「咁如果我有錯都可以攞到？」答案係可以。呢個計劃係根據《交通意外傷亡者（援助基金）條例》（第229章）設立，屬於不論過失、唔睇經濟狀況嘅一種即時經濟援助，幫助交通意外嘅受害人、或者佢哋嘅家人，應付短期開支。車手獎同其他不論過失意外賠償點樣分，法哥喺另一篇講晒。

申請之後，會由社會福利署轄下嘅交通意外傷亡援助組負責審批，批出金額同埋處理發放。

---

邊啲人可以申請車手獎？

要成功攞到車手獎，其實唔係人人都符合資格。以下條件，你一定要中哂先可以申請：

基本申請條件

條件	詳細說明
發生咗交通意外	意外要符合《交通意外傷亡者（援助基金）條例》定義，例如係道路上嘅車輛撞擊事件
有向警方報案	意外後必須即時報警，報案紀錄係必要文件
合法喺香港居留	受害人喺意外發生時必須係香港合法居留人士（持有香港身份證／工作簽證／入境紙等）
病假天數達標	根據意外發生日期，病假日數有分別： – 意外發生喺2025年6月28日凌晨之前，最少要有 3日 病假 – 意外發生喺2025年6月28日凌晨之後，最少要有 7日 病假 （病假必須由註冊醫生或註冊中醫出具證明）
或者傷勢屬於永久傷殘 / 死亡	無需病假證明，只要有醫療報告證明係永久性傷殘，或者死亡都符合資格
喺6個月內申請	意外發生後計起6個月內要遞交申請，唔可以拖太耐

小貼士：

• 「病假3日／7日」係包括星期六、日或者公眾假期；
• 唔好自己請假頂數，一定要有註冊醫生或註冊中醫寫嘅病假紙；
• 唔記得報警 = 無得申請；
• 唔係香港居民，即使你喺香港出意外，一樣唔合資格。

---

車手獎金額可以有幾多？

每個申請人攞到幾多錢，係根據受傷情況、住院日數、年齡等因素計算出嚟嘅。呢啲金額唔係固定一筆，而係根據政府制定嘅發放細則，分咗幾個類別。

以下係2024年最新發放標準嘅簡單總結：

不同情況對應嘅援助金額

類別	金額說明
殯葬援助	每人最高 $16,790（如喪葬費用已由其他機構支付，會扣減）
死亡援助	視乎死者是否唯一家庭經濟支柱： – 唯一養家者死亡：首位受養人可得 $175,100，其餘每人 $14,590（最多 $248,050） – 有其他家庭成員工作：首位受養人可得 $87,550，其餘每人 $14,590（最多 $160,500） – 非家庭支柱但有未成年子女：首名子女 $87,550，其餘每人 $14,590
傷殘援助	按傷殘程度計算，由 $210 起，最高可達 $210,120。 如果受害人超過60歲，援助金會減至三分之二
受傷援助	視乎住院／病假日數，由 $804 起，最多 $66,900（計180日上限） 死亡前如有受傷日數，超過7日可領
臨時生活援助	針對失去收入嘅人或無收入要照顧15歲以下子女嘅父母： 由 $486 起，最高 $87,540

補充說明：

• 援助金係一筆過支付；
• 所有金額都會由社會福利署核實後發放；
• 唔可以雙重申領（即同一項目唔可以向多個政府部門拎重複援助）。

---

點樣申請車手獎？

好多朋友聽過車手獎，但唔知點申請，其實申請方法幾簡單，只要準備好資料，再跟住以下步驟做就得：

申請流程

Step 1： 交通意外發生後，即刻報警，拎定報案編號
Step 2： 盡快睇醫生，攞定病假紙／醫療報告／收據
Step 3： 填寫申請表，可以喺社會福利署網站下載
Step 4： 遞交申請，可以揀以下方式：

• 親身交去：旺角聯運街30號旺角政府合署1樓101室
• 郵寄
• 傳真（2893 8690）
• 電郵（tavaenq@swd.gov.hk）
• 網上表格（亦有提供）

Step 5： 攞齊以下文件一齊交：

• 申請人身份證副本
• 醫生病假紙／死亡證明書／住院紀錄
• 銀行戶口證明（用嚟收錢）
• 交通意外報案紀錄副本
• 其他需要文件（例如家屬關係證明）

特別注意：

• 除非真係有特別情況，一般都要親身去社署提供證明文件；
• 成功與否會有書面通知，再等幾星期就會收到援助金；
• 文件唔齊／病假紙唔夠／超過限期，全部都可能導致申請被拒。

拎咗車手獎之後，仲可唔可以民事索償？

好多人以為拎咗「車手獎」就唔可以再追究其他賠償，其實呢個諗法係錯嘅。你係可以拎完車手獎之後，再搵律師代表你向對方保險公司追討賠償。

「車手獎」只係一筆臨時性、不論對錯嘅援助金，幫你應付即時嘅經濟壓力，例如醫療費、失去收入等。政府發放呢筆錢，唔代表有人承認咗錯，亦唔會限制你之後採取其他法律行動。

但如果你日後成功喺民事訴訟或和解中獲得賠償金，你需要將車手獎嘅金額全數退返畀社會福利署。

簡單講，流程會係咁：

1. 交通意外發生 → 你拎車手獎（唔理邊個錯）
2. 搵律師幫你追第三方責任 → 向對方保險公司索償
3. 成功獲得賠償 → 退返「車手獎」金額畀政府
4. 你實際攞到嘅賠償金額，通常都比車手獎高

民事索償一般包括：

• 醫療費
• 精神損害
• 損失收入
• 長遠工作能力影響
• 护理／復康費用

咁我應唔應該申請車手獎先？

應該。因為車手獎係應急錢，唔需要等到民事案件結果。如果你符合申請條件，應該盡快申請，唔好等律師話你可以索償先遞交表格，以免過咗6個月期限。

你申請咗車手獎，唔代表你放棄其他權利；你成功索償之後，亦只係退返本身車手獎嘅部分。

---

車手獎常見問題Q&A

車手獎係咪一定要司機先有份拎？

唔係。雖然叫「車手獎」，但唔係得司機先可以攞。只要你係交通意外中受傷嘅人，包括行人、乘客、踩單車人士等，都可以申請。

---

唔知對方資料可以申請嗎？

可以。申請車手獎唔需要你提供肇事司機姓名／車牌，只要你有報警紀錄，證明你真係交通意外受害人，已經足夠。

---

醫生話唔需要放病假，可以申請車手獎嗎？

如果冇放到最少3日（或7日）病假，又唔屬於永久傷殘／死亡情況，就唔合資格申請。但如果你受傷後有持續覆診，可以要求醫生補寫病假紙，或者由註冊中醫出證明。

---

無法親身交文件點算？

社署一般要求親身交表，但如果你行動不便、住院中或有特別理由，可以聯絡交通意外傷亡援助組解釋情況，有機會獲得特別安排。

---

攞到車手獎幾耐？

正常申請流程，由遞表至收到錢，大約需時6至10星期。但如果文件唔齊、資料有爭議、或社署需要再查證，時間會再拉長。

---

可以搵邊啲人幫我跟進申請？

如果你對申請程序唔熟悉，可以搵熟悉程序嘅律師、社工，甚至係法哥團隊，幫你睇下你係咪合資格，需唔需要幫手準備資料。

---

車手獎會唔會影響我攞綜援、傷殘津貼？

會有影響。車手獎係一筆過收入，可能會影響你當月申領某啲政府援助。但因為呢筆錢係一次性，唔屬於長期收入，可以向社署解釋情況，申請豁免處理。

---

真實個案分享（改名處理）

阿強係一位外賣電單車司機，有日送餐途中畀架私家車撞到，腳骨裂，要做手術，住院5日。當時佢冇諗咁多，只係照指示報警、睇醫生。

一個朋友提醒佢可以申請車手獎，阿強就喺意外後第3星期交咗表。結果，社署批咗傷殘援助約$30,000，臨時生活援助$18,000，總共攞到接近$50,000。

之後，阿強再經法哥配對到律師，發現對方司機冇保持車距，屬於疏忽。律師幫佢向保險公司追討民事賠償，成功獲得賠償$220,000，佢最後按指引退返咗車手獎俾政府。

---

法哥貼士：邊啲情況值得考慮民事索償？

• 你嘅傷勢比較嚴重，例如骨折、需動手術、留院多日；
• 因意外導致長時間冇得做嘢，影響家庭收入；
• 有醫生證明工作能力受損；
• 交通意外係因對方唔小心（例如冇讓路、衝燈、非法轉線）

只要有懷疑，唔好自行放棄你嘅權利。你可以攞車手獎，同時搵律師幫你做民事索償，咁樣先真正保障到你自己。

---

結語：車手獎係即時援助，唔係最終補償

好多人誤會咗，以為拎完車手獎就代表「呢單嘢完咗」，其實唔係。車手獎幫你解燃眉之急，但真真正正幫你爭取公平賠償，往往要靠民事索償。

申請條件唔複雜，最重要係及早報警、攞病假證明、唔好拖延。如果你唔肯定自己符唔符合資格，法哥可以幫你睇一睇。

---

想搵人幫你申請？唔知可唔可以民事索償？填表搵法哥幫你免費睇案！

只要你試過交通意外，唔論你係行人、司機、乘客、外賣員，只要覺得自己有損失，都可以交表等我哋團隊幫你睇下值唔值得行法律程序。我哋唔係中介，唔會抽佣，只係幫你搵最啱你情況嘅律師。

---

延伸閱讀

想進一步了解車手獎相關資訊？以下幾篇文章會幫你解答更多常見問題，令你申請更有信心：

• 【深入解釋】車手獎賠償金額點樣計？｜唔同情況賠幾多？有冇例子？
• 咩係「不論過失」？｜點解唔洗分對錯都可以攞錢？
• 車手獎首10日每日$765點解？｜補貼有期限，申請要快！
• 車手獎計算方法詳解｜點樣估到自己攞到幾多？

建議儲低呢幾篇文章，真係唔小心遇到意外，都知道點樣保護自己權益。